Аргентина терма жамоаси ҳужумчиси Лионель Месси ўз маблағи билан мамлакат футбол федерациясининг терма жамоа қўриқлаш хизмати олдидаги қарзларини тўлади.
Қўриқлаш хизмати ходимлари федерация бошқаруви ва молиялаштирувида юзага келган инқироз туфайли олти ойдан буён маош олмай келаётган эдилар.
Мессининг бу иши ҳақида аргентиналик журналист ХУан Пало Варски "Метро" радиосига маълум қилди.
"Месси Белк-Оризонтида Бразилияга қарши ўйин олдидан хонада ўтирганида эшик тақиллаб қолди. Хонага икки-уч киши, терма жамоа қўриқчилари кириб келди ва деди: "Лео, сенда гапимиз бор. Бизга беш-олти ойдан буён маош беришмаяпти. Вазият қийин, сен жамоа сардорисан, сен бизни биласан, бизга ёрдаминг керак".
Месси шу ондаёқ отасига қўнғироқ қилди ва у керакли маблағни терма жамоа қўриқлаш хизматига ўтказди. Шу билан муаммо ечилди.
