Мамлакат миллий чемпионатининг сўнгги тур ўйинлари эртага бошланади. Бекободнинг “Металлург” жамоаси охирги учрашувни ўз майдонида Фарғонанинг “Нефтчи” жамоасига қарши ўтказади.   Мазкур жамоалар чемпионатларимиз тарихида бугунгача 37 марта ўзаро куч синашишган. Устунлик беш карра мамлакат чемпиони – фарғоналиклар томонида. Водийликлар 23 та ўйинда ғалаба қозонган бўлса, бекободликлар 6 ўйинда зафар қучган. 8 та ўйинда эса кучлар тенг келган. Киритилган ва ўтказиб юборилган тўплар фарқи 72:35. Бекободда ўтказилган ўйинларнинг 5 тасида мезбонлар, 6 тасида меҳмонлар ғалаба қозонишган. 7 та ўйинда дуранг натижа қайд этилган.   Бу йилги чемпионатнинг биринчи даврасида “Нефтчи” жамоа сардори Шукурали Пўлатов томонидан киритилган ягона гол эвазига ғалаба қозонди. Охирги турда бекободликлар таркибида “Локомотив”га қарши ўйинни дисквалификация боис ўтказиб юборган марказий ҳимоячи Исломжон Қобилов майдонга тушади.