«Манчестер Юнайтед» ҳужумчиси Златан Иброҳимович Швеция пойтахтидаги «Френдс Арена» стадиони яқинида ҳайкали ўрнатилиши ҳақидаги хабарларга изоҳ берди.
«Ҳиссиётларга тўлиб кетяпман. Баъзилар: «Нега айнан унга?» - деган савол беришлари мумкин. 15 йил давомида терма жамоада ва 20 йил давомида клубларда фаолият юритдим. Ниҳоят мени меҳнатим ҳам қадрланганидан хурсандман.
Одатда ҳайкални ўлимдан сўнг қўйишади, бироқ мен тирикман. Ўлганимдан кейин эса бу ҳайкал абадий яшайди» - деди Иброҳимович.
35 ёшли футболчи Швеция терма жамоаси таркибида 114 ўйин ўтказиб, 62 гол урган. Яқинда эса қаторасига 10-марта мамлакатнинг энг яхши футболчиси деб тан олинди.
