Ҳужумчи Хамза Абделкарим тез орада доимий асосда «Барселона» клубига ўтади. Қишки трансфер ойнасида «кўк-анорранглилар» мисрлик футболчини Қоҳиранинг «Ал-Аҳли» клубидан жорий мавсум якунига қадар ижарага олган эди.
Журналист Габриэль Санснинг берган маълумотларига кўра, Испания клуби 18 ёшли футболчини тўлиқ сотиб олиш ҳуқуқидан фойдаланишга қарор қилган. Ушбу келишув «Барселона»га 3 миллион еврога тушади, бонуслар билан эса бу сумма 5 миллион еврогача етиши мумкин.
Эътиборли жиҳати шундаки, Хамза Абделкарим муқаддам миллий жамоа сафида умуман майдонга тушмаган бўлса-да, Миср терма жамоасининг Жаҳон чемпионати учун якуний қайдномасидан жой олди. Истиқболли ҳужумчи ҳозирча «Барселона»нинг асосий таркибида ҳам ўйин амалиётига эга бўлгани йўқ — у клубнинг ўринбосарлар жамоасида тажриба тўпламоқда.
