Шаҳмат бўйича жаҳон чемпионлиги учун кечаётган Сергей Карякин ва Магнус Карлсен ўртасида тўққизинчи партия бўлиб ўтди. Россиялик ва норвегиялик шахматчи ўртасидаги баҳс бу сафар дуранг билан якунига етди.

Бу партияда Карякин оқ, Карлсен қора доналарда ўйнаганини таъкидлаб ўтиш лозим. Беш ярим соат давом этган ўйиннинг 74-юришига келиб томонлар гроссмейстерлар дурангга имзо чекишди.

Магнус бу партиядаги дуранг натижадан хурсанд эканини ўйиндан кейинги матбуот анжуманида таъкидлаб ўтди: «Мағлубиятдан қутулиб қолганимдан хурсандман. Мен унчалик яхши ўйнай олмадим ва барчаси мен учун ёмон тугаши мумкин эди».

Шу пайтгача ўтказилган 9та баҳснинг 8таси дуранг билан якунланган бўлса, битта ўйинда Карякин ғалаба қозонишга муваффақ бўлди. Ҳозирча ҳисоб — 5:4. Ўнинчи партия бугун бўлиб ўтади ва норвегиялик шахматчи унда оқ доналар билан ўйнайди.

55-шахмат тожи учун баҳс 12та партиядан иборат бўлади. Унда 6,5 очко жамғарган спортчи ғолибликни қўлга киритади. Мусобақанинг мукофот жамғармаси 1 миллион долларни ташкил этади. Ғолиб унинг 60 фоизини олса, мағлуб шахматчига 40 фоизи берилади.