Жаҳон чемпионлиги учун бўлиб ўтаётган Магнус Карлсен ва Сергей Карякин ўртасидаги мусобақанинг 10-партияси якунланди. Норвегиялик спортчи тўқнашувдаги илк ғалабасини қўлга киритди ва умумий ҳисобни тенглаштиришга муваффақ бўлди.

Ўйиннинг 75-юришига келиб россиялик шахматчи мағлубиятни тан олди. Бу пайтга келиб Карлсен рақибига нисбатан бир пиёда устунлигига эришаётганди ва у пиёдаларидан бирини Фарзинга олиб чиқишига Карякин қаршилик қила олмасди.

Ўйин бошида, 20-юришдан кейин Сергей Карякин дурангга эришиши мумкин эди, аммо рус гроссмейстери бу имкониятдан фойдаланмади. Боз устига, Сергей эндшпилда, 56-юришда хатога йўл қўйди. Магнус эса бу хатодан унумли фойдаланди ва ғалаба қозонди.

Жаҳон чемпионлиги учун кечаётган баҳсда ҳисоб тенглашди — 5:5. Шахматчилар яна иккида партия ўтказишади. Шундан кейин ҳам дуранг қайд этилса, қўшимча партиялар ўйналади.

Эслатиб ўтамиз, шахмат тожи учун кураш Нью-Йорк шаҳрида бўлиб ўтмоқда. Мусобақанинг мукофот жамғармаси 1 миллион доллар бўлиб, ғолиб шахматчига 600.000, мағлуб бўлган спортчига 400.000 доллар берилади.

Гроссмейстерлар бугун дам олишади. Эртага ва индинга 11 ва 12-партиялар ўтказилади.