Халқаро футбол федерацияси (ФИФА) 2016 йилнинг энг яхши аёл футболчиси номига даъвогар уч номзоднинг исмини эълон қилди.

Бу ҳақда, ФИФА матбуот хизматига асосланиб, «ТАСС» хабар бермоқда.
Номзодлар рўйхатига бразилиялик Марта, германиялик Мелани Берингер ва АҚШ вакиласи Карли Ллойд киритилди.

Мелани Берингер Германия термаси сафида жаҳон чемпиони (2007), Олимпия ўйинлари ғолиби (2016) ва икки карра Европа чемпиони (2009, 2013) саналади. Марта икки карра жаҳон чемпионати (2007, 2011) ва Олимпия ўйинлари (2004, 2008) кумуш медали соҳибаси. Карли Ллойд жаҳон чемпиони (2015) ва икки карра Олимпиада ғолиби (2008, 2012) унвонига эга.

ФИФА 2016 йилнинг энг яхши аёл футболчиси номини 2017 йилнинг 9 январь куни Цюрих (Швейцария)да бўлиб ўтадиган маросимда эълон қилади.