"Барселона"нинг собиқ яримҳимоячиси, ҳозирда Қатарнинг "Ас Сад" клуби футболчиси Хави Каталония ва Тунис терма жамоалари ўртасида ўртоқлик учрашуви олдидан берган интервьюсида Месси билан Роналдуни таққослаб ўтди.

"Мен ватаним - Каталония ҳақида ҳам, мени доим яхши қабул қиладиган Испания ҳақида ҳам ёмон гап айта олмайман.

Мени сиёсат қизиқтирмайди, ага бу мавзуга сўз очсам, таниқли инсон сифатида эмас, оддий фуқаро сифатида гапираман.

Каталонияга қайтиб, дўстларим билан учрашганимдан хурсандман. Бизни ҳар икки жамоа ғалаба учун курашадиган ажойиб ўйин кутиб турибди. Биз Каталония спортидан завқ олишимиз керак.

Месси - дунё тарихидаги энг яхши ўйинчи. Роналду - мавсумнинг энг яхши ўйинчиси, аммо Месси билан ҳеч ким рақобат қила олмайди", - дейди Хави.

Эслатиб ўтамиз, сентябрь ойи бошларида Хави билан Роналду ўртасида матбуотда "сўз жанги" бўлиб ўтган эди.