«Валенсия» клубининг фанатлари Питер Лим бошчилигидаги клуб раҳбарияти қарши оммавий норозилик намойишини ўтказишди.
Испания кубогининг нимчоракфиналидан ўрин олган «Сельта» клубига қарши ўйиндан олдин мухлислар «Лим, йўқол уйингга» деган қичқириқлар билан оммавий тадбир ўтказишди. Ўйин 1:4 ҳисобидаги шармандали мағлубият билан якунлангач, мухлислар яна кўчаларни тўлдириб, нафақат Лим, балки спорт директори Гарсия Питархнинг ҳам истеъфосини талаб қилишди. Фақатгина полициянинг аралашуви орқали намойишчилар тарқатиб юборилди.
Айни пайтда «Валенсия» Испания чемпионати жадвалининг сўнгги ўринларида бормоқда. Жамоа Сегундага тушиб кетиш хавфи остида турибди.
