Ўтган мавсумни чемпионат жадвалининг олтинчи поғонасида якунлаган Навоийнинг “Қизилқум” клуби аъзолари режага кўра, иккинчи босқич ўқув-йиғин машғулотларини ўз қароргоҳларида давом эттиришяпти.

Ҳамиджон Актамов раҳбарлигида кончилар янги мавсум тараддудига ўтган йилнинг 15 декабридан киришганди. Сўнгра жамоа мураббийлар штаби ва футболчилар 26 декабрда пойтахтимизда тиббий кўрикдан ўтишди.

Янги йил байрами муносабати билан эълон қисқа таътилдан сўнг, жамоа аъзолари 5 январдан яна Навоийда машғулотларни давом эттиришяпти.

Янги мавсумга тараддуд кўраётган “Қизилқум” жамоаси таркибида бир қатор ўзгаришлар бор. Жумладан, ўтган мавсумда кончилар шарафини ҳимоя қилган Элиёржон Акбаров, Шукур Жумабоев, Неманья Йованович, Равшан Аслонов, Ҳамза Каримов, Отабек Нарзуллаев, Нодирхон Камолов каби ўйинчилар жамоани тарк этган. Айни чоғда Навоийдаги машғулотларда Мансур Саидов, Шукур Пўлатов (“Нефтчи”), Отабек Зокиров (“Қўқон-1912”), Азамат Алланиёзов (“Насаф”), Умид Хонимқулов (“Олмалиқ”) сингари футболчилар иштирок этишяпти.