Карло Анчелоттининг “Бавария”си ушбу мавсумни бироз беқарор равишда бошлади.

Буни етакчи ўйинчиларининг жиддий жароҳат олиб майдондан ташқарида узоқ қолиб кетганлиги, майдондаги футболчилар эса Анчелоттининг ўйин услубига мослашишлари учун вақт талаб этилганлиги билан оқлашимиз мумкин. Клуб ўз етакчиси Арьен Роббеннинг кузнинг охирларида ўз спорт формасини тиклаб майдонга қайтганидан сўнг анча самарали натижаларга эриша бошлади. 33 ёшли голландиялик футболчи жамоасининг муҳим ўйинчиларидан бири ҳисобланади, ахир.

Ўтган ҳафтада клуб ишқибозларининг кўнгли бироз хира бўлди. Клуб етакчилари Хаби Алонсо ва Филип Ламлар ушбу мавсум якунида футболчилик фаолиятларини якунлашларини маълум қилишди. Уларнинг баҳтига, клубнинг 10-рақам эгаси шартномасини 2018-йилгача узайтирди. 33 ёшли қанот ҳужумчиси душанба куни мюнхенликлар билан янги шартномага имзо чекди.

Мавсум бошидан бери барча мусобақаларда «Бавария» уч маротаба мағлубиятга учради. Уларнинг барчасини жамоа Арьен Роббенсиз қабул қилиб олди. Демак, 33 ёшли голландиялик футболчи Германиянинг амалдаги чемпионларини ғалаба сари етакламоқда ва жамоанинг муҳим бўлаги ҳисобланади.

Роббен ушбу мавсумда жамоанинг етакчиси

Ноябр ойига қадар жароҳатларини даъволаган Роббен ёрқин даврларидаги каби “Бавария”ни яна муваффақиятлар сари етакламоқда. Бундеслигада, ҳозирча унинг ҳисобида 5 гол ва 4 голли узатма бор. 33 ёшда бўлишига қарамай, Арьен Роббен Европанинг гранд жамоаларидан бирида ҳали ҳам ўз иқтидорини намоён этишда давом этмоқда. Яқинда берган интервюсида эса қуйидаги фикрларни билдириб ўтди: “Ёшимдан хавотирда эмасман. Мен ҳозирда ўзимни жуда яхши ҳис қиляпман, бу сенсатсия. Биламан, фаолиятимнинг якуний босқичидаман, бироқ ҳали яна ўйнаш ниятидаман”