Барселонада чоп этилувчи Mundo Deportivo газетаси Ла Лиганинг биринчи даврасидаги "Реал" ва "Барселона" иштирокидаги ўйинларни таҳлил қилган. Якуний хулосага кўра, ҳакамлар хатоси "Реал"га 8 очко кўпроқ жамғаришга, "Барселона"га эса, аксинча, 4 турнир баллини йўқотишга замин яратган.

Мисол сифатида нашр "Реал" ва "Сельта" ўртасида ўтган учрашув (2:1) га эътибор қаратган. Унда голлардан бири Альваро Мората томонидан тоза офсайд ҳолатида урилган. Худди шундай эътироз "Малага"га қарши ўйин (2:1)да Рамоснинг голига нисбатан қўлланилган. Шунингдек, ҳакамлар хатоси "Эспаньол" (2:0) ва "Депортиво" (3:2) ўйинларида ҳам қайд этилган.

"Барселона" иштирокидаги ўйинларда ҳакамлар хатоси 8 марта қайд этилган бўлиб, уларнинг учтасида амалдаги чемпион очко йўқотган: "Сельта"га қарши ўйин (3:4)да Неймарга нисбатан ишлатилган қўполлик учун пенальти белгиланмаган, "Малага"га қарши ўйин (0:0) да офсайд нотўғри белгиланиши оқибатида Пикенинг голи инобатга олинмаган ва "Вильярреал" га қарши ўйин (1:1) да жарима майдони ичида рақиб икки бор қўли билан ўйнагани учун пенальтилар белгиланмаган.

Бироқ, нашр шуни ҳам таъкидлайдики, "Реал Сосьедад"га қарши ўйинда "Барселона" дарвозасига урилган тоза гол каталонияликларга қўшимча бир очко ишлаб топишга имкон берган.

Ла Лиганинг 19 тури ўтиб бўлгач, "Реал" "Валенсия"га қарши захира ўйинига эга бўла туриб, "Барселона"дан икки очко олдинда бормоқда.