«Милан» клуби ва Хорватия терма жамоаси ярим ҳимоячиси Лука Модрич А Серия 34-тури доирасидаги «Ювентус»га қарши баҳсда (0:0) олган жароҳати сабабли жарроҳлик амалиётини ўтказди.
Миландаги «Ла Мадоннина» клиникасида кечган операция муваффақиятли якунланди. 40 ёшли футболчи чап юз суягининг мураккаб ва кўплаб синиши ташхиси билан шифохонага ётқизилган эди. Доктор Лука Аутелитано бошчилигидаги гуруҳ томонидан ўтказилган амалиётда клуб шифокорлари Стефано Маццони ва Андреа Булгерони ҳам иштирок этишди.
«Клуб Лукага олдинда турган жаҳон чемпионати олдидан тезроқ соғайиб кетишини тилайди», — дейилади «Милан» клубининг расмий баёнотида.
Эслатиб ўтамиз, «Сан-Сиро»да кечган баҳсда Модрич ҳаводаги тўп учун курашда рақиб билан тўқнашиб кетган эди.
