«Milan» klubi va Xorvatiya terma jamoasi yarim himoyachisi Luka Modrich A Seriya 34-turi doirasidagi «Yuventus»ga qarshi bahsda (0:0) olgan jarohati sababli jarrohlik amaliyotini o‘tkazdi.
Milandagi «La Madonnina» klinikasida kechgan operasiya muvaffaqiyatli yakunlandi. 40 yoshli futbolchi chap yuz suyagining murakkab va ko‘plab sinishi tashxisi bilan shifoxonaga yotqizilgan edi. Doktor Luka Autelitano boshchiligidagi guruh tomonidan o‘tkazilgan amaliyotda klub shifokorlari Stefano Massoni va Andrea Bulgeroni ham ishtirok etishdi.
«Klub Lukaga oldinda turgan jahon chempionati oldidan tezroq sog‘ayib ketishini tilaydi», — deyiladi «Milan» klubining rasmiy bayonotida.
Eslatib o‘tamiz, «San-Siro»da kechgan bahsda Modrich havodagi to‘p uchun kurashda raqib bilan to‘qnashib ketgan edi.
