«Сандерленд» бош мураббийи Дэвид Мойес ВВС журналисти Вики Спарксга нисбатан қилган қўполлиги учун кечирим сўради.
The Telegraph нашри хабарига кўра, журналист аёл АПЛ 29-туридан ўрин олган «Бёрнли»га (0:0) қарши ўйиндан сўнг мураббийни ноқулай аҳволга солган.
Хусусан у, «Сандерленд» хўжайини Эллис Шортнинг стадионга ташриф буюриши Мойеснинг келажагини сўроқ остига қўядими, деган савол билан мурожаат қилган.
Мойес матбуот-анжуманидан кейин Спаркс ёнига келиб: «Бу жуда қўпол гап бўлди, ўзингга эҳтиёт бўл. Аёл киши бўлишингга ҳам қараб турмайман, тарсаки еб қолишинг мумкин. Кейинги сафар савол бераётганингда ўйлаб гапир» - деган. Спаркс мураббийнинг бу гапларини ёзиб олишга муваффақ бўлган, аммо унинг устидан ҳеч қаерга шикоят қилмаган. Шундан сўнг ВВС раҳбари Мойесни мухбирни қўрқитишда айблаб чиққан ва судга мурожаат қилишини айтган.
Кейинроқ Мойес аёлга қўнғироқ қилиб, кечирим сўраган. Спаркс ҳам, ВВС ҳам мураббийнинг узрини қабул қилган.