"Челси" бош мураббийи Антонио Конте Англия кубоги яримфиналида "Тоттенҳэм" устидан қозонилган ғалаба (4:2) ҳақида фикр билдираётиб, ўз қарорлари натижа бераётганини қистириб ўтди.
"Англия кубоги финалига чиққанимиз билан фахрланаман. Бу менинг Англиядаги биринчи мавсумим, биз чемпионатда қийин кураш олиб боряпмиз, энди эса Англия кубоги учун курашамиз.
Футболчилар ва мухлислар учун хурсандман. Бугун ўйиннинг бошидан охиригача зўр ўйнадик. Шу руҳда давом этишимиз керак, яқинда бизни чемпионатдаги қийин ўйин кутиб турибди. Мухлисларимизнинг қўллашларидан умидворман.
Мавсум давомида мураббий қийин қарорларни чиқариши керак бўлади. Агар ютсанг - ҳаммаси яхши, мағлуб бўлсанг - жавобгарлик сенинг бўйнингда. Ўйлашимча, бугунги режаларимиз амалга ошди", - дейди Конте.
