«Рома» спорт директори Мончи жамоа ҳужумчиси Франческо Тотти ёзда фаолиятини якунлашини тасдиқлади.

«Тотти мавсум охирида фаолиятини якунлаши ҳақида клуб билан келишиб олган. Шундан сўнг у раҳбарлик лавозимида иш бошлайди. Франческо «Рома»нинг тимсолидир, у билан яқиндан иш олиб бораман. У биладиган нарсаларнинг 1%ни англаб олишга ҳаракат қиламан» - деди Мончи.

Эслатиб ўтамиз, Тотти «Рома» клубидаги фаолиятини 1989 йили, 13 ёшида бошлаган. 16 ёшида асосий жамоа таркибида дебют қилиб, 1992-2017 йиллар давомида 783 ўйин ўтказган ва 307 гол урган. 2001 йилда «Рома» билан Италия чемпиони, 2006 йилда Италия билан жаҳон чемпиони бўлган.