«Roma» sport direktori Monchi jamoa hujumchisi Franchesko Totti yozda faoliyatini yakunlashini tasdiqladi.
«Totti mavsum oxirida faoliyatini yakunlashi haqida klub bilan kelishib olgan. Shundan so‘ng u rahbarlik lavozimida ish boshlaydi. Franchesko «Roma»ning timsolidir, u bilan yaqindan ish olib boraman. U biladigan narsalarning 1%ni anglab olishga harakat qilaman» - dedi Monchi.
Eslatib o‘tamiz, Totti «Roma» klubidagi faoliyatini 1989 yili, 13 yoshida boshlagan. 16 yoshida asosiy jamoa tarkibida debyut qilib, 1992-2017 yillar davomida 783 o‘yin o‘tkazgan va 307 gol urgan. 2001 yilda «Roma» bilan Italiya chempioni, 2006 yilda Italiya bilan jahon chempioni bo‘lgan.
