Madridning «Real» klubi sobiq bosh murabbiyi Xabi Alonso «qirollik klubi»dagi qisqa faoliyatidan ko‘ngli qolganini yashirib o‘tirmadi.

Cadena SER nashrining xabariga ko‘ra, ispaniyalik mutaxassis o‘z yaqinlari bilan suhbatda o‘tgan yili Madrid klubini boshqarishga rozi bo‘lib, katta xatoga yo‘l qo‘yganini tan olgan. Alonso o‘z murabbiylik faoliyati davomida boshqa hech qachon bunday xatoga yo‘l qo‘ymasligini ta’kidlagan.

Ma’lumot uchun, Xabi Alonso «Real»ni 2025 yilning yozidan 2026 yilning yanvariga qadar boshqardi. Ushbu tayinlovgacha mutaxassis uch mavsum davomida Leverkuzenning «Bayer» klubida muvaffaqiyatli faoliyat yuritgan edi. U Germaniya klubi bilan Bundesliga, Germaniya kubogi va mamlakat Superkubogida g‘olib chiqqan.

Shuningdek, Xabi Alonso 2024 yil yakunlariga ko‘ra Germaniyada «Yilning eng yaxshi murabbiyi» deb topilgan edi.