Футбол бўйича Ўзбекистон Олий лигасининг 10-туридан жой олган 5 та учрашувга якун ясалди.

Ғузорнинг «Шўртан»и Тошкентнинг уч гранд жамоасини дастлабки ўн турда мағлуб этган клубга айланиб олди. Бунга қадар «Локомотив»ни 2:0, «Пахтакор»ни эса 3:0 ҳисобида енгган «газчилар», 10-турда Миржалол Қосимов мураббийлик қилаётган «Бунёдкор»ни таслим қилди — 1:0.

Маълумот учун, Қосимов «қалдирғочлар» билан расмий машғулот ўтказишни икки кун аввал бошлаганди.

Турнинг марказий ўйини водийда кечиб, унда Наманган ва Қўқон шаҳри клублари ўзаро тўқнаш келди. Валентин Коваленко 90-дақиқага келиб ҳисобда олдинда бораётган мезбонлар дарвозасига пенальти тайин қилди ва шу тариқа водий дербиси дуранг билан якунига етди.

Ўзбекистон Олий лигаси
10-тур беллашувлари
12 май, жума

«Металлург» — «Сўғдиёна» 3:1
Голлар: Ислом Қобилов, 9 (1:0). Достон Турсунов, 22 (2:0). Ғулом Ўрунов, 47-пен (2:1). Жаҳонгир Абдумўминов, 54 (3:1).

«Нефтчи» — «Обод» 1:0
Гол: Мўйдин Мамазулунов, 65 (1:0).

«Навбаҳор» — «Қўқон—1912» 1:1
Голлар: Неманя Йованович, 23 (1:0). Мурод Холмуҳаммедов, 90-пен (1:1).

«Шўртан» — «Бунёдкор» 1:0
Гол: Умар Эшмуродов, 14 (1:0).

«Пахтакор» — «Бухоро» 2:1
Голлар: Владимир Козак, 47 (1:0). Суҳроб Нуриллаев, 82 (2:0). Иван Нагаев, 90 (2:1).

13 май, шанба
«Динамо» — «Насаф»
«Локомотив» — «Қизилқум»
«Машъал» — «Олмалиқ»