Ўзбекистон кубогидан ўрин олган “Навбаҳор” - “Нефтчи” (2:1) ўйинидан сўнг, меҳмонлар бош мураббийи Андрей Фёдоров ўйин ҳақидаги фикрлари билан ўртоқлашди.
«Ўйин яхши таассурот қолдирди. Икки ўйин натижасига кўра кейинги босқичга чиққанимиздан хурсандмиз. “Навбаҳор”га қарши ҳар қандай қарама-қаршиликлар доимо муросасиз руҳда кечади. Бугун ҳам кубокка хос баҳс бўлди. Учрашувларни қийин кечиши сабабли, бундай баҳсларда голлар сони у қадар кўп бўлмайди. Уйдами ёки сафардами осон ўйиннинг ўзи бўлмайди. Бугунги учрашув мухлисларга ёққан бўлиши мумкин. Негаки, сўнгги сонияларгача кескинлик сақланиб турди. Навбатдаги босқичга чиққанимиздан хурсанд эканлигимни яна бир бор таъкидлаш билан бир қаторда жамоамизни табриклайман. Мақсадимиз, кейинги босқичга чиқиш эди. Таблода қайд этилган натижа “Нефтчи”ни кейинги босқичга чиқишини таъминлади.
Легионерларимизнинг бири анчадан бери жароҳат сабабли майдонга туша олмаяпти. Яна бир хорижлик футболчимиз Комаровскийга эса дам беришни лозим топдик. У барча учрашувларда иштирок этиб келаётганлиги сабабли чарчоқ аломатлари кўзга ташланганди. Шу сабабли бугун уларнинг хизматларидан фойдаланмасликни лозим топдик.
Учрашув арафасида клуб раҳбариятида юз берган ўзгаришларга эътибор қаратмаслик ҳақида йигитларга айтиб ўтгандик. Вазифаларига профессионал тарзда ёндошиб, майдонга чиқиб ўз ишларини қилишларини таъкидлаб ўтдик. Улар профессионал эканликларини амалда кўрсатиб, олдиларига қўйилган вазифани бажаришди» - деди Фёдоров.
