Анъанавий турнирга айланган «Европадаги Ўзбекларнинг футбол турнир-байрами» бешинчи маротаба «Давра» ўзбеклар жамияти тарафидан 25-Май куни Мюнхен шаҳрида ташкил қилинди.
Турнир-байрам Ўзбекистон Республикасининг Германия Федератив Республикаси Франфурт Майн шаҳридаги бош консуллиги ҳамда Ўзбекистон Республикасининг Германия Федератив Республикасидаги элчихонаси қўллаб-қувватлови билан амалга оширилди. Турнирда жами ўнта жамоа иштирок этиб икки гуруҳга бўлинган ҳолда иккита майдонда параллел ўйинлар ўтказилди.
А гуруҳда FC Triesdorf, FC Olympia München, FC Frankfurt, FC Bavaria ва FC Davra жамоалари ўзаро куч синашишган бўлса
Б гуруҳда FC MBA Triesdorf, FC Dortmund, FC München, FC Frankfurt United ҳамда FC Uzbek United жамоалари куч синашишди.
А гуруҳида биринчи ўринни эгаллаган FC Frankfurt Б гуруҳида иккинчи ўринни эгаллаган FC Dortmund билан ярим финалнинг асосий қисми ва қўшимча вақтида дурранг ўйнаб пеналти тепишлар эвазига финалга йўлланмани қўлга киритди.
Б гуруҳида биринчи ўринни эгаллаган FC München жамоаси эса А гуруҳида иккинчи ўринни эгаллаган FC Triesdorf билан ярим финал баҳсида 5-0 ҳисобида ғалаба қозониб финалга йўлланмани қўлга киритди.
Шу ўринда таъкидлаб ўтиш керакки, FC Frankfurt жамоасининг икки етакчи ўйинчиси ярим финал ўйинида қаттиқ жароҳатланиб финал баҳсида иштирок эта олмади. Шиддатли ўтган финал учрашувида FC München 3-0 ҳисобида ғалаба қозониб Давра кубоги 2017 ни қўлга киритди.
Турнирда энг яхши дарвозабон деб FC Frankfurt жамоаси дарвозабони Нодир Ҳожиев, энг яхши ўйинчи деб FC München ўйинчиси Шоҳжахон Гаипов тан олинди. Турнир тўрурари эса FC München ҳужмчиси Аброр Шоназаров бўлди. Барча ўйинчиларга эсдалик совғалар ва Давра дипломи топширилди.
FC Frankfurt жамоасига иккинчи ўринни олганлик медали, FC München жамоасига эса биринчи ўринни олганлик медали ва Давра кубоги топширилди.
Турнир охирида барча ватандошлар Ўзбекистон Республикасининг Германия Федератив Республикаси Франфурт Майн шаҳридаги бош консуллиги ҳамда Ўзбекистон Республикасининг Германия Федератив Республикасидаги элчихонаси тарафидан тайёрланган ош дастурхонига таклиф қилинди. Ўта юқори кайфиятда ўтган турнир-байрамига миллий таомимиз ҳисобланмиш ошни дастурхонга тортилиши байрамга ўзгача файз бахш этди. Ватандошларимиз турнир-байрамидан катта таасуротлар билан қайтаётганликларини таъкидлашди ва шундай байрамлар чет элда яшаётган ватандошларимиз учун жуда катта аҳамиятга эга эканлигини айтишди. Тадбирда Ўзбекистон Республикасининг Германия Федератив Республикаси Франфурт Майн шаҳридаги бош консулликдан бош консул Еркин Ҳамроев ҳамда Ўзбекистон Республикасининг Германия Федератив Республикасидаги элчихонасидан Мамур Расулов ва Асқар Бекназаровлар иштирок этишди.
Анвар ШЕРМАТОВ, Берлин шаҳри
