Туркиялик спринтчи Рамил Гулиев Athletics Turkcell Super League мусобақаларида 100 метрлик масофага 9,97 сонияда етиб борди. Бу ҳақда Туркия Енгил атлетика федерацияси сайтида хабар берилмоқда.
Шундай қилиб, Гулиев 100 метрлик маррага 10 сониядан тезроқ етиб борган тарихдаги иккинчи оқтанли спортчи бўлди. Бундай натижага эришган биринчи спортчи эса франциялик Кристоф Лемэтрдир. У 2010 йилда бу масофани 9,98 сонияда югуриб ўтган, бир йил ўтгач шахсий рекордини ўрнатган — 9,92 сония.
Гулиев келиб чиқиши озарбойжонлик бўлган 27 ёшли турк енгил атлетикачисидир. У 2011 йилда Туркия фуқаролигини олган. Шу сабабли, унинг барча натижалари Туркияга тегишли ҳисобланади. Гулиев ўз вақтида 60, 100, 200, 300 метрларга югуришда Озарбойжон рекордчиси ҳам бўлган.
Югуриш тарихида 100 метрлик масофани 10 сониядан тезроқ босиб ўтган спортчилар сони 100 дан ортиқ. Халқаро енгил атлетика федерациялари ассоциацияси (IAAF) 10 сониялик тўсиқ эгалланганини фақат тўлиқ автоматлашган секундомерлардан фойдаланилганида, шамол тезлиги сониясига 2 метрдан кам бўлган, допинг ишлатилмаган ҳолатдагина ҳисобга олади.
Бу масофада ямайкалик Усейн Болт жаҳон рекордчиси. У 2009 йили бўлиб ўтган енгил атлетика бўйича жаҳон чемпионатида 100 метрни 9,58 сонияда югуриб ўтган.
