Ҳакамлар томонидан фойдаланиладиган, йўқолиб қолувчи кўпик сепадиган спрей ихтирочиси ундан футболда фойдаланишни тўхтатишни талаб қилди.
Бразилиялик тадбиркор Гейне Аллеманье уни 2000 йилда ихтиро қилган эди. Айни пайтда у ўз ихтиросидан фойдалангани учун ФИФА ташкилотидан 30 млн евро талаб қилмоқда.
GloboEsporte хабарига кўра, ФИФА унинг барча талабларини жавобсиз қолдирган. Натижада тадбиркор Халқаро футбол уюшмалари кенгашига (IFAB) мурожаат қилиб, спрейдан фойдаланишни тўхтатишни сўраган.
«ФИФА менга жавоб бермаяпти. Менда ихтиро учун олинган патент бор, демак ҳақман. ФИФА эса буни эътиборсиз қолдирмоқда, ўғирлик эса давом этмоқда. Мен машҳурликни излаётганим йўқ, унинг ихтирочиси мен эканимни ҳамма билади. Мен ФИФА ташкилотидан 30 млн еврони тортиб олмоқчи эмасман, балки адолатни талаб қилмоқдаман» - деди Аллеманье.
Аллеманье «Spuny» деб номланган спрейни 2000 йилда ихтиро қилган. Биринчи марта бу янгиликдан 2001 йилда Бразилия чемпионати ва Жоао Авеланж кубогида фойдаланилди. Тадбиркор 2002 йилда ўз ихтироси учун патент олган.
2011 йилда спрей Америка кубогида, терма жамоалар миқёсида илк маротаба қўлланди. 2014 йилда эса биринчи марта Бразилиядаги жаҳон чемпионатида ишлатилди.
