Франциянинг «ПСЖ» клуби билан шартнома имзолаган Неймарнинг таништирув маросими Бразилияда жуда катта қизиқиш уйғотган.

Клуб президенти Носир Ал-Хилайфий гапига кўра, уни 85 миллион бразилиялик жонли эфирда томоша қилган.

"Globo ТВ эгаси билан суҳбатлашганимда, у менда Неймарнинг тақдимот маросимини Бразилиядан қанча одам кўрганини топишимни сўради. Аввалига 5 миллион деган вариантни айтдим. Кейин 10 миллион дедим. Шунда у менга маросимни 85 миллион киши жонли кузатганини айтди. Бу даҳшатли рақам. Ахир гап фақатгина таништириш маросими ҳақида кетмоқда" - деди Носир Ал-Хилайфий.

Эслатиб ўтамиз, «ПСЖ» Неймарни «Барселона»дан товон пули ҳисобланган 222 миллион еврони тўлаб, сотиб олганди.