«Реал» бош мураббийи Зайниддин Зидан Испания Ла лигасининг 4-тури доирасида бўлиб ўтган «Реал Сосьедад»га қарши ўйин (3:1) борасида ўз фикрларини билдириб ўтди.

«Майораль – жамоанинг бир бўлаги. У ҳали ёш, аммо унинг нималарга қодирлигини билардим. У жамоада муҳим роль ўйнаши мумкин ва буни у исботлади. Мен хурсандман, боиси, ўйинчилардан талаб қилинадиган нарсага — уларнинг яхши ўйнашига эришяпмиз. Бугун Майораль ажойиб ўйнагани жуда муҳим аҳамиятга эга. У яхши ҳаракатланди ва ғалаба тўпини киритишга муваффақ бўлди.

«Сосьедад»га бўш ҳудудлар тақдим қилинса, муаммолар яратиши мумкинлигини билардик. Биз ўйинни яхши ўқидик. Рақибга ўз жарима майдончамизга яқинлашиш имкониятини берганимизда, бизга қийин бўларди. Шунга қарамай, рақибимиз яхши ўйнади.

Бэйл учун хурсандман. Биз у ҳақида кўп гапирамиз, лекин у бугун ўз маҳоратини кўрсатди. Унга нисбатан сабр қилишимиз керак. Бэйл нафақат қарши ҳужумларда, балки бошқа жиҳатдан ҳам яхши ўйин кўрсатади. Ҳа, у тезкор ўйинда ўзини яхшироқ кўрсатади. Бундан ташқари, унинг техникаси яхши ва тор ҳудудда ҳам вазиятдан яхши чиқиб кетади. Гол уришидан олдин у 70 метр масофани 30 км/соат тезликда босиб ўтди ва совуққонлик билан дарвозани ишғол қилди», — деди Зидан.