ФИФА «Челси» клубини ёш футболчиларни рўйхатдан ўтказишда трансфер қоидаларини бузганликда гумон қилмоқда.

The Telegraph хабарига кўра, ташкилот клуб устидан текширувни бошлаган. Бу сўнгги 8 йилда учинчи марта содир бўляпти.

Лондонликлар устидан биринчи текширув 2007 йилда ўтказилган бўлиб, ўшанда Франциянинг «Ланс» клубидан Гаэль Какута клубга келиб қўшилганда, трансфер қоидалари бузилгани маълум бўлган. «Челси»га икки йиллик трансфер тақиқи жорий қилинган, бироқ клуб апелляция судида бу тақиқни олиб ташланишига эришганди.

Ўтган йили эса ФИФА Бертран Траоренинг лондонликлар сафига келиб қўшилиши бўйича текширув ўтказганди.

Ҳозирда ФИФА «Челси»нинг трансфер сиёсати бўйича яна бир текширув ўтказмоқда. Бироқ бу ишни айнан қайси трансфер юзасидан олиб борилаётгани номаълум.

Аммо клубдагилар ФИФА томонидан билдирилаётган шубҳаларнинг ҳеч бири тўғри эмас деб ҳисобламоқда ва барча трансферлар тегишли қонун талаблари асосида амалга оширилганига ишончи комил.