FIFA «Chelsi» klubini yosh futbolchilarni ro‘yxatdan o‘tkazishda transfer qoidalarini buzganlikda gumon qilmoqda.

The Telegraph xabariga ko‘ra, tashkilot klub ustidan tekshiruvni boshlagan. Bu so‘nggi 8 yilda uchinchi marta sodir bo‘lyapti.

Londonliklar ustidan birinchi tekshiruv 2007 yilda o‘tkazilgan bo‘lib, o‘shanda Fransiyaning «Lans» klubidan Gael Kakuta klubga kelib qo‘shilganda, transfer qoidalari buzilgani ma’lum bo‘lgan. «Chelsi»ga ikki yillik transfer taqiqi joriy qilingan, biroq klub apellyasiya sudida bu taqiqni olib tashlanishiga erishgandi.

O‘tgan yili esa FIFA Bertran Traorening londonliklar safiga kelib qo‘shilishi bo‘yicha tekshiruv o‘tkazgandi.

Hozirda FIFA «Chelsi»ning transfer siyosati bo‘yicha yana bir tekshiruv o‘tkazmoqda. Biroq bu ishni aynan qaysi transfer yuzasidan olib borilayotgani noma’lum.

Ammo klubdagilar FIFA tomonidan bildirilayotgan shubhalarning hech biri to‘g‘ri emas deb hisoblamoqda va barcha transferlar tegishli qonun talablari asosida amalga oshirilganiga ishonchi komil.