Бразилия терма жамоаси яримҳимоячиси Карлос Каземиро ЖЧ-2018 саралаш босқичи доирасидаги Боливияга қарши (5 октябрь) учрашувда илк марта жамоасини сардор сифатида майдонга бошлаб тушади. Бу ҳақда Goal.com нашри хабар тарқатди.
Натижада , «Реал» яримҳимоячиси ўтган йилнинг июнидан бошлаб жамоа бошқарувини қўлга олган Тите мураббийлиги давридан буён 12-жамоа сардори бўлади.
«Жамоа сардори бўлишимдан фахрдаман. Аслида шунчаки терма жамоа сафида тўп суришнинг ўзи катта ифтихор. Қанчалик бахтли эканимни сўз билан таърифлаб бера олмайман», — деган Каземиро.
Бразилия ЖЧ-2018 йўлланмасини аллақачон ҳал қилиб бўлган. Тите шогирдлари саралаш босқичи тугашига икки тур қолганда 37 очко тўплаб, яқин таъқибчиси Уругвайни 10 очкога ортда қолдириб кетган.
