«Барселона» бош мураббийи Эрнесто Вальверде Испания кубоги 1/16 финал босқичи доирасида «Мурсия»га қарши бўлиб ўтган дастлабки ўйин (3:0) борасида ўз фикрларини билдириб ўтди.

«Бу Кубокка хос ўйин бўлиб ўтди. Рақибимиз анча ҳаяжонланди. Биз ҳужумда кескин ўйнашга ҳаракат қилдик. Биринчи бўлимда ҳамма ўйлаган ишимиз амалга ошмади. Иккинчи бўлимда эса иккита гол уришга муваффақ бўлдик. Тўғри, рақиб ҳам вақти-вақти билан яхши ўйнади. Лекин захира таркибига имконият бериб, ғалаба қозонганимиздан хурсандман. Ўйлайманки, футболчилар ҳам хурсанд бўлишди.

Арнаис ўзига ишонган футболчи. Ақлий жиҳатдан аниқ ҳаракат қилади. Бугунги ўйин у учун дастлабки қадам бўлди. Ўйлайманки, келажакда бизга унинг ёрдами тегади», — деди Вальверде.