Англиянинг "Манчестер Юнайтед" клуби ярим ҳимоячиси Поль Погба учта учрашувда жамоасига ёрдам бера олмайдиган бўлди.
Франциялик футболчи "Арсенал" билан ўйинда испаниялик Эктор Бельеринга қарши оёғининг таг қисми билан зарба бергани учун қизил карточка олганди. Англия футбол Ассоциацияси бу вазиятни кўриб чиқди ва Погбани 3та учрашувга дисквалификация қилишга қарор қилди.
Клуб раҳбарияти FA томонидан қабул қилинган бу қарор юзасидан апелляция бермайдиган бўлди. Шунингдек, футболчи бош ҳакам Андре Марринер қарори юзасидан, унга қарата кинояли қарсак чалгани учун ҳам жазоланмайдиган бўлди. Чунки бош ҳакам бу ҳолатни ўз ҳисоботига киритмади.
Энди 24 ёшли Погба "Манчестер Сити", "Борнмут" ва "Вест Бромвич" клубларига қарши ўйинларни ўтказиб юборади.
