Кўпчиликка маълумки, Тошкентнинг “Бунёдкор” жамоаси мана бир неча йилдирки, спорт либослари борасида Германиянинг JAKO компанияси билан ўзаро ҳамкорлик қилиб келади.

Айни кунларда “Бунёдкор” футбол клуби тижорат директори Айниддин Ғиёсов Германиянинг Франкфурт шаҳрида бўлиб турибди.

Жаҳонга машҳур спорт бренди саналмиш JAKO ва “Бунёдкор” ФК ўртасида навбатдаги музокаралар бўлиб ўтди. Германиянинг Франкфурт шаҳрида JAKO компанияси маркетинг ва сотув бўйича директори Ханс Веркл ва “Бунёдкор” ФК тижорат директори Айниддин Ғиёсов ўртасидаги муҳокама натижасида янги шартнома имзоланди.

- “Бунёдкор” футбол клубини Осиё қитъасида қандай нуфузга эга эканлигини жуда яхши биламиз. Бундай жамоа билан ҳамкорлигимиз йилдан-йилга мустаҳкамланиб бораётганидан хурсандмиз. Айнан “Бунёдкор” орқали JAKO компанияси либослари Осиё бозорида янада оммалашишиб бораётганини яширмаймиз, - дейди  Ханс Веркл.

- JAKO либосларидан фойдаланиб келаётганимизга олти йилдан ошди. Ушбу компания либосларининг сифати ва қулайлиги “Бунёдкор” клубини қониқтиради. Шунингдек, JAKOнинг замонавий дизайни ҳам бошқалардан алоҳида ажралиб туради. Айнан “Бунёдкор” ФК учун тикилаётган либосларни ўз кўзим билан кузатиб чиқдим. Ўйлайманки, “Бунёдкор”нинг янгидан-янги чўққиларни забт этишида ушбу компаниянинг ҳам ўзига хос ҳиссаси бўлади, - дейди Айниддин Ғиёсов.

Демак, “Бунёдкор” ФК ва JAKO компанияси ўртасидаги ҳамкорлик давом этади.

P.S. “Бунёдкор” ФКнинг янги – 2018 йилги либослари қандай кўринишда бўлиши билан тез кунда танишасиз.