«Атлетико» ҳамда Аргентина миллий терма жамоаси ҳужумчиси Хулиан Альварес «Барселона»га ўтиш арафасида турибди.

Аргентиналик журналист Гастон Эдул DSports Radio эфирида каталонияликлар клуби футболчи билан шахсий шартнома шартларини аллақачон келишиб олганини маълум қилди.

Манбага кўра, томонлар беш йиллик шартнома бўйича келишувга эришган. Шу билан бирга, Альварес «ПСЖ»нинг қизиқишига қарамай, фаолиятини давом эттириш учун устувор вариант сифатида айнан «Барселона»ни кўрмоқда.

«Бу ҳақда катта ишонч билан айта оламан — Хулиан Альвареснинг келаси мавсумда “Атлетико”да қолиб кетиши жуда ҳам эҳтимолдан йироқ», — деди Эдул.

Аввалроқ «кўк-анорранглилар» бош мураббийи Ханс-Дитер Флик аргентиналик футболчини жамоанинг ҳужум чизиғини кучайтириш учун асосий номзодлардан бири сифатида кўраётгани ҳақида хабар берилган эди.

Ўтган мавсумда Альварес «Атлетико»нинг етакчиларидан бири бўлиб, қатор Европа грандларининг эътиборини тортди. Энди унинг «Барселона»га кўчиб ўтиши тобора эҳтимолийроқ бўлиб бормоқда.