Ko‘pchilikka ma’lumki, Toshkentning “Bunyodkor” jamoasi mana bir necha yildirki, sport liboslari borasida Germaniyaning JAKO kompaniyasi bilan o‘zaro hamkorlik qilib keladi.

Ayni kunlarda “Bunyodkor” futbol klubi tijorat direktori Ayniddin G‘iyosov Germaniyaning Frankfurt shahrida bo‘lib turibdi.

Jahonga mashhur sport brendi sanalmish JAKO va “Bunyodkor” FK o‘rtasida navbatdagi muzokaralar bo‘lib o‘tdi. Germaniyaning Frankfurt shahrida JAKO kompaniyasi marketing va sotuv bo‘yicha direktori Xans Verkl va “Bunyodkor” FK tijorat direktori Ayniddin G‘iyosov o‘rtasidagi muhokama natijasida yangi shartnoma imzolandi.

- “Bunyodkor” futbol klubini Osiyo qit’asida qanday nufuzga ega ekanligini juda yaxshi bilamiz. Bunday jamoa bilan hamkorligimiz yildan-yilga mustahkamlanib borayotganidan xursandmiz. Aynan “Bunyodkor” orqali JAKO kompaniyasi liboslari Osiyo bozorida yanada ommalashishib borayotganini yashirmaymiz, - deydi  Xans Verkl.

- JAKO liboslaridan foydalanib kelayotganimizga olti yildan oshdi. Ushbu kompaniya liboslarining sifati va qulayligi “Bunyodkor” klubini qoniqtiradi. Shuningdek, JAKOning zamonaviy dizayni ham boshqalardan alohida ajralib turadi. Aynan “Bunyodkor” FK uchun tikilayotgan liboslarni o‘z ko‘zim bilan kuzatib chiqdim. O‘ylaymanki, “Bunyodkor”ning yangidan-yangi cho‘qqilarni zabt etishida ushbu kompaniyaning ham o‘ziga xos hissasi bo‘ladi, - deydi Ayniddin G‘iyosov.

Demak, “Bunyodkor” FK va JAKO kompaniyasi o‘rtasidagi hamkorlik davom etadi.

P.S. “Bunyodkor” FKning yangi – 2018 yilgi liboslari qanday ko‘rinishda bo‘lishi bilan tez kunda tanishasiz.