O‘zbekiston va Iroq terma jamoalari o‘z tarkiblarini e’lon qilgach, «Paxtakor» jahon chempionati ishtirokchilari soni bo‘yicha mamlakatning yetakchi klubi ekani ma’lum bo‘ldi. «Sherlar» safidan mundialda ishtirok etadigan futbolchilar soni besh nafarni tashkil etmoqda.

Bu esa «Paxtakor» FIFAdan futbolchilarni jahon chempionatiga tayyorlagani uchun kamida 1 million dollar miqdorida bonus olishini anglatadi. Amalda bu summa yanada yuqori bo‘lishi kutilmoqda. Chunki so‘nggi ikki yil davomida jamoa safida jahon chempionati ishtirokchilari bo‘lgan boshqa futbolchilar ham o‘ynagan. Masalan, Igor Sergeev shular jumlasidandir.

Bundan tashqari, FIFA joriy mundialdan boshlab futbolchilarning saralash bosqichi uchrashuvlaridagi ishtiroki uchun ham klublarga kompensasiya to‘laydi. Biroq bu holatda mablag‘ni futbolchi aynan o‘sha saralash uchrashuvi kuni sharafini himoya qilgan klub oladi.

Jahon chempionati saralash bosqichida 900 dan ortiq o‘yin o‘tkazilgan bo‘lib, ularda bir necha ming futbolchi qatnashgan. Shu bois har bir futbolchining so‘nggi ikki yillik klublar tarixi bo‘yicha ma’lumotlarni aniq hisoblab chiqish ancha murakkab vazifa bo‘ladi.