Маълумки, кикбоксинг спорт турининг «TNA» версиясида фақат зарба техникасидан фойдаланган ҳолда жанг олиб бориш талаб этилади. «Vityaz Fight» жамоаси таркибида мусобақаларда қатнашган ҳамюртимиз Шер Мамазулунов россиялик рақиби Дмитрий Меньшиковни очколар бўйича мағлубиятга учратиб, мутлақ жаҳон чемпионига айланди.
— Жанг жуда кескин ўтишини олдиндан сезгандим, — деди Шер. — Аммо мен ушбу жангга ҳар жиҳатдан тайёр эдим…
Ажабланарлиси, Шер кикбоксинг бўйича машғулотлар ўтказиш, чемпионатларга тайёрланиш билан бир вақтда автомойкада ҳам ишлайди. Ўзининг айтишича, бу нарса унга сира халал бермайди.
Биз ҳам ҳамюртимиз Шер Мамазулуновни жаҳон чемпиони деган юксак номга сазовор бўлгани билан чин кўнгилдан муборакбод этиб қоламиз.
