Бразилия терма жамоаси устози Тите кутилмаганда ЖЧ-2018 учун мўлжалланган асосий таркибни эълон қилиб қўйди.

UOL Esport нашрига берган интервьюсида Тите 15 нафар футболчини Россияга олиб кетишини тан олди.

«Рўйхат бир томондан очиқ, аммо бошқа томондан ёпиқ. Мен асосий таркибнинг 11 нафар футболчисини танлаб олганман. Улар жорий мавсумда жуда яхши ўйнамоқдалар: Алиссон, Дани Алвес, Маркиньос, Миранда, Марсело, Каземиро, Ренато Аугусто, Паулиньо, Коутиньо, Неймар ва Габриэл Жезус.

Шунингдек, 4 нафар захира футболчиси ҳам аниқ: Тиаго Силва, Фернандиньо, Виллиан ва Фирмино», – деди Тите.

Эслатиб ўтамиз, Бразилия ЖЧ-2018 гуруҳ босқичида Швейцария, Коста Рика ва Сербия билан беллашади.