Европа чемпионлар лигаси нимчорак финал босқичи доирасида «Рома» ўз уйида «Шахтёр»ни қабул қилди. Украинада бўлиб ўтган дастлабки ўйинда донецкликлар 2:1 ҳисобида ғалаба қозонишганди.

Шу боис, жавоб ўйинида римликларни минимал ҳисобдаги ғалаба ҳам қаноатлантирарди. "Рома" бу ишни ажойиб тарзда уддалади. Италияликлар ўз дарвозалари дахлсизлигини сақлаб қолган ҳолда, иккинчи бўлим бошида Эдин Жеконинг голи эвазига ҳисобни очишди. Босниялик ҳужумчи дарвозабон билан яккама-якка вазиятга чиқди ва дарвозани ишғол қилди.

Орадан 10 дақиқа ўтиб Жеко "дубл"ни расмийлаштириши мумкин эди, аммо унинг бу галги зарбасига бироз аниқлик етишмади. Боз устига, учрашувнинг 79-дақиқасида донецкликлар ҳимоячиси Ордец Жекога нисбатан "сўнгги умид" сифатида фол ишлатди ва майдондан четлатилди.

Қўшиб берилган дақиқаларда "Шахтёр" ҳисобни тенглаштириши мумкин эди. Чап қанотдан Исмоилий етказиб берган узатмага Дентиньо бироз ета олмади. Акс ҳолда у дарвозани ишғол қилиши ва жамоасини чорак финалга олиб чиқиши мумкин эди.

Шу тариқа, "Рома" чорак финал йўлланмасини ҳал қилди.

ЕЧЛ, нимчорак финал, жавоб ўйини
Рома Италия – Шахтёр Украина 1:0 (0:0, 1:0)
Гол: 1:0 – 52 Джеко.
Рома – Алиссон, Фасио, Манолас, Коларов, Флоренци, Стротман, де Росси, Ундер (Жерсон, 65), Наингголан, Перотти, Джеко (Эль-Шаарави, 89).
Шахтёр – Пятов, Ордец, Исмаили, Бутко, Ракицкий, Фред, Степаненко (Алан Патрик, 74), Тайсон, Марлос (Дентиньо, 82), Бернард, Феррейра.
Огоҳлантиришлар: Флоренци (39), Манолас (54), Степаненко (71), Фред (76), Феррейра (80).
Четлатиш: Ордец (79).
Дастлабки ўйин — 1:2