Ўзбекистон ва Кения олимпия терма жамоалари ўртасида кечган ўйиндан сўнг меҳмонлар бош мураббийи Фрэнсис Киманзи фикрлари билан ўртоқлашди.

- Осиё чемпионларига қарши яхши ўйин ўтказдик. Ўзбекистон олимпия терма жамоасининг иккинчи қаватдаги ўйини менга маъқул бўлди. Рақиб жамоа сафидаги ҳар бир футболчида кураш олиб боришга кучли иштиёқ борлигига аҳамият қаратдим. Баҳс ҳар иккала жамоа учун фойдали бўлди, деб ўйлайман. Ўзбекистон яхши шакллангани кўзга ташланди, жамоа бежиз қитъа чемпионлигини қўлга киритмаган. Яна бир нарсани таъкидлашни истардим, рақиб ўйинчилари жуда ёш ва уларнинг келажаги порлоқ.

- Жамоангиз биринчи бўлимда иккита гол урди, буни кутганмидингиз?

- Буни албатта режалаштиргандик дея олмайман, бу жамоани олдиндан яхши ўрганган эдик. Чемпионларга қарши яхши маълумотлар йиққан эдик. Яна айтишим мумкинки, қанотларда вингерлармиз учун бўш ҳудудлар очиб беришди бу бизга қулайлик туғдирди. Умуман олганда Осиё чемпионига қарши ўйнаш биз учун шараф бўлди.

- Ўйинни бошқарган маҳаллий ҳакамларнинг ишига муносабатингиз?

- Мен экспертмасман, бунинг устига ҳакамлар ҳақида гапиришни ёқтирмайман бу менинг ишим эмас. Ҳамма мураббийлар каби ҳакамлар қарори бизнинг фойдасига бўлишини истайман. Ўйин тезкор бўлди, бундай ўйинларда ҳакамларга осон бўлмайди Шунинг учун уларнинг ишига яхши баҳо бераман.

- Дарвозабонингизни ўзини тутиши ҳақида, у расмий ўйинларда ҳам шундай ишлар қиладими ёки ўртоқлик учрашуви бўлгани учун ўзини шундай тутдими?

- Бу дарвозабон бизда ўзи тенгиларнинг энг кучлиси. У яхши дриблингга ҳам эга, унинг ўйинлари бизга ёққани учун уни дарвозага қўямиз.