"Металлург" - "Бухоро" жамоалари учрашувдан кейин ўтказилган  матбуот анжуманида мезбонлар бош мураббийи Андрей Шипилов қатнашди.

Андрей Шипилов, "Металлург" жамоаси бош мураббийи: - Мусобақа жадвалининг кучли учлигида бораётган жиддий рақибга қарши ўйнадик. Ҳар иккала жамоа биринчи таймни эҳтиёткорлик билан ўтказди. Хатога йўл қўймаслик пайида бўлишди ва буни уддалашди.

Иккинчи тайм бошида эса қўпол хато эвазига гол ўтказиб юбордик. Яхшиямки, кўп вақт ўтказмасдан иккита гол билан жавоб қайтардик. Учрашувнинг якуний дақиқалари биз учун оғир кечди. Лекин бошқа хатога йўл қўймадик.

Кетма-кет муваффақиятсиз ўйинлардан кейин бу ғалаба биз учун жуда зарур эди ва биз уни сақлаб қола олдик. Бугун биринчи таймда шогирдларимнинг ўйинидан қониқиш ҳосил қилдим.

Иккинчи таймда масъулият юки оғирлик қилдими, ёки иссиқ ҳаво таъсирими, анча палапартиш ҳаракатлар кузатилди. Барчаси хайрли тугаганлигидан хурсандмиз. Энди бир кунлик дам олишдан сўнг сафар ўйинига тайёргарликни бошлаймиз, дейди Андрей Сергеевич.