“Локомотив” Суперлига 9-тури доирасида “Пахтакор”га қарши баҳс юритди. 0:0 ҳисобида якунланган ўйиндан кейинги матбуот анжуманида “Локомотив” бош мураббийи вазифасини бажарувчи Андрей Фёдоров ҳамда ўйиннинг энг яхши футболчиси Санжар Шоаҳмедов иштирок этишди.
– Куни кеча ушбу стадионда бугунги каби жуда муҳим беллашувда майдонга тушгандик. Бугунги баҳс менга жуда манзур бўлди. Бизга фақат гол етишмади. Яратилган вазиятларни голга айлантира олмадик. Айниқса, танаффусдан кейин йигитлар анча яхши ўйин намойиш этишди, ўзларида куч топа олишди. Биз ўйинни умуман олганда ёмон ўтказмадик. Фақат имкониятлардан унумли фойдаланишда омадимиз чопмади.
Биласизми, “Локомотив” аллақачон ўзаги шаклланган жамоа. Унга янги келган футболчиларнинг бошланғич таркибдан тезда жой олиши қийин. Шунинг учун ҳам баъзи янги ўйинчиларимиз ҳали кўп ўйин амалиётига эга бўлишмаяпти, – деди тажрибали мутахассис.
– Учрашув жуда қизиқарли кечди. Биз ҳам қўлдан келганча яхши ўйин кўрсатишга уриндик. Лекин гол киритиш насиб этмади, – деди Санжар Шоаҳмедов.
