“Lokomotiv” Superliga 9-turi doirasida “Paxtakor”ga qarshi bahs yuritdi. 0:0 hisobida yakunlangan o‘yindan keyingi matbuot anjumanida “Lokomotiv” bosh murabbiyi vazifasini bajaruvchi Andrey Fyodorov hamda o‘yinning eng yaxshi futbolchisi Sanjar Shoahmedov ishtirok etishdi.

– Kuni kecha ushbu stadionda bugungi kabi juda muhim bellashuvda maydonga tushgandik.  Bugungi bahs menga juda manzur bo‘ldi. Bizga faqat gol yetishmadi.  Yaratilgan vaziyatlarni golga aylantira olmadik. Ayniqsa,  tanaffusdan keyin yigitlar ancha yaxshi o‘yin namoyish etishdi,  o‘zlarida kuch topa olishdi. Biz o‘yinni umuman olganda yomon o‘tkazmadik. Faqat imkoniyatlardan unumli foydalanishda omadimiz chopmadi.

Bilasizmi, “Lokomotiv” allaqachon o‘zagi shakllangan jamoa. Unga yangi kelgan futbolchilarning boshlang‘ich tarkibdan tezda joy olishi qiyin. Shuning uchun ham ba’zi yangi o‘yinchilarimiz hali ko‘p o‘yin amaliyotiga ega bo‘lishmayapti, – dedi tajribali mutaxassis.

– Uchrashuv juda qiziqarli kechdi. Biz ham qo‘ldan kelgancha yaxshi o‘yin ko‘rsatishga urindik.  Lekin gol kiritish nasib etmadi, – dedi Sanjar Shoahmedov.