«Реал» бош мураббийи Зайниддин Зидан Европа чемпионлар лигаси финалидан кейин матбуот анжуманида иштирок этиб, жамоа ҳужумчиси Криштиану Роналду борасида ўз фикрларини билдириб ўтди.

— Криштиану «Реал»дан кетиши мумкинлиги ҳақида гапирди. У қоладими? Криштиану бу ҳақда бугун гапириб, худбинлик қилмаяптими?
— Йўқ, мен бундай деб ўйламайман. Ҳозир биз фақат ўйин ҳақида, эришган натижамиз ҳақида ўйлаймиз. Бор эътиборимизни шунга қаратишимиз керак. Кейин эса кўрамиз. Ҳар доим гапириб келганман: Криштиану «Реал»да қолиши керак.

— Криштиану қолишини тасдиқлайсизми?
— Ҳозиргина тушунтирдим: у қолиши керак, у биз билан қолиши керак. У — «Реал» футболчиси. Бу клубда у эришган натижаларни сўз билан таърифлаш қийин.

— Сиз унинг ўзи билан гаплишдингизми, у ростдан кетишни истамоқдами?
— Йўқ, гаплашмадим. Агар у нимадир деган бўлса, бу унинг сўзлари. Лекин ҳозир биз фақат қўлга киритилган ғалабадан мароқланишимиз керак. Балки, орадан 3-4 кун ўтиб Криштиану яна нимадир дер, аммо ҳозир бу ҳақда гапиришнинг мавриди эмас.