«Хоразм» клуби ҳужумчиси Қадамбой Нурметов Про-лига 17-туридан ўрин олган «Орол» (3:0) клубига қарши сафар ўйинидан сўнг, ўз фикрлари билан ўртоқлашди.

Ўйиннинг 62-дақиқасида Қадамбой дарвозабон билан юзма-юз вазиятда гол уриб, ҳисобни очган эди.

«Бугунги ўйин қийин бўлди. «Орол»ни ўз майдонида жиддий рақиб эканини билардик. Шунга яраша яхши тайёргарлик кўрдик. Ниятимиз ғалаба қозониш эди. Йигитларга раҳмат, уларнинг меҳнати билан ниятимизга етдик.

Бир ойдан ортиқ вақт давомида рақиб дарвозасини ишғол этолмагандим. Бу футбол, баъзан омад келмайди, баъзан бошқа сабаблар юз беради. Ҳужумчиларда ҳам пасайиш юз бериб туради, мана Луис Суарес ҳам анча пайтгача гол уролмай юрган эди. Насиб қилса, буёғига рақиблар дарвозасига яна кўплаб гол уришга ҳаракат қиламан.

Мухлислар шунча йўл босиб, бизни қўллаб-қувватлаш учун сафар ўйинига боришди. Бундан жуда хурсандмиз, бу бизга жуда ёрдам берди. Уларнинг ишончини оқладик деб ўйлаймиз» - деб ҳужумчи сўзларини келтирмоқда «Хоразм» клуби мухлислари телеграм канали.