Бугунги кунда Миллий олимпия қўмитаси аҳолини спортга қизиқтиришга энг қуйи бўғиндан бошлаб эътибор қаратмоқда. Бунга мисол сифатида кўплаб мактабгача таълим муассасаларида ёш болажонлар учун кўргазмали чиқишлар, маҳорат сабоқлари ўтказилаётганлигини келтириб ўтишимиз мумкин.
Бу борада спорт курашлари ассоциацияси энг фаоллардан бири бўлиб турибди. Ташкилот томонидан навбатдаги тадбирлар Наманган вилояти Тўрақўрғон туманидаги 18-сонли, шунингдек, Хоразм вилояти Урганч шаҳридаги 9-сонли мактабгача таълим муассасаларида ўтказилди.
Спорт тадбирларида вилоятнинг етакчи спортчилари ёш мухлислар учун мастер-класс намойиш этишди. Спортчиларнинг чиқишлари болакайларда олам-олам таассурот қолдирди.
Албатта, бундай тадбирларни ўтказишдан мақсад ёш авлодда спортга бўлган қизиқишни уйғотишдан иборат. Айнан мана шундай чиқишлар орқали уларда мазкур спорт турига бўлган қизиқиш пайдо бўлади. Бу эса ўз навбатида янгидан-янги Осиё, Жаҳон ва Олимпия чемпионларини етиштириб чиқаришда катта аҳамиятга эгадир.
