Bugungi kunda Milliy olimpiya qo‘mitasi aholini sportga qiziqtirishga eng quyi bo‘g‘indan boshlab e’tibor qaratmoqda. Bunga misol sifatida ko‘plab maktabgacha ta’lim muassasalarida yosh bolajonlar uchun ko‘rgazmali chiqishlar, mahorat saboqlari o‘tkazilayotganligini keltirib o‘tishimiz mumkin.

Bu borada sport kurashlari assosiasiyasi eng faollardan biri bo‘lib turibdi. Tashkilot tomonidan navbatdagi tadbirlar Namangan viloyati To‘raqo‘rg‘on tumanidagi 18-sonli, shuningdek, Xorazm viloyati Urganch shahridagi 9-sonli maktabgacha ta’lim muassasalarida o‘tkazildi.

Sport tadbirlarida viloyatning yetakchi sportchilari yosh muxlislar uchun master-klass namoyish etishdi. Sportchilarning chiqishlari bolakaylarda olam-olam taassurot qoldirdi.

Albatta, bunday tadbirlarni o‘tkazishdan maqsad yosh avlodda sportga bo‘lgan qiziqishni uyg‘otishdan iborat. Aynan mana shunday chiqishlar orqali ularda mazkur sport turiga bo‘lgan qiziqish paydo bo‘ladi. Bu esa o‘z navbatida yangidan-yangi Osiyo, Jahon va Olimpiya chempionlarini yetishtirib chiqarishda katta ahamiyatga egadir.