Хабар бериб ўтганимиздек, Бангкок шаҳрида енгил атлетика бўйича ёшлар ўртасида Осиё чемпионати ниҳоясига етди. Унда ўзбекистонлик ёш атлетлар ҳам иштирок этишди.

Эътиборлиси, ушбу нуфузли мусобақада уч нафар спортчимиз – Регина Адашбоева (босқон улоқтириш), Роксана Худоярова (учхатлаб сакраш) ва Умид Ҳасанов (босқон улоқтириш) белгиланган меъёрни бажариб, октябрь ойида Буэнос-Айресда бўлиб ўтадиган III ёзги ўсмирлар Олимпия ўйинларида иштирок этиш ҳуқуқини қўлга киритишди.

Бугун терма жамоамиз аъзолари мусобақадаги иштирокларини якунлаб, юртимизга қайтиб келишди. Уларни Ислом Каримов номидаги Тошкент халқаро аэропортида Миллий олимпия қўмитаси ва енгил атлетика федерацияси мутасаддилари, мураббийлар, спортчиларнинг яқинлари ва оммавий ахборот воситалари ходимлари кутиб олишди.

«Мусобақа ҳис-ҳаяжонли дамларга бой бўлди. Осиё чемпионати олдидан жуда ҳаяжонлангандим. Аммо, якунда ўз мақсадимга етдим ва ватанимиз учун муҳим бўлган йўлланмани қўлга кирита олдим. Бу фақат бошланиши. Энди бизни Аргентинадаги Олимпия ўйинлари кутиб турибди. Ўйинларгача қаттиқ тайёргарлик кўрамиз ва у ерда ҳам медаллар қўлга киритиб, юртдошларимизни хурсанд қилмоқчимиз», – деди Олимпия ўйинларининг бўлажак иштирокчиси Роксана Худоярова.

Қайд этиш лозимки, енгил атлетикачиларимизнинг лицензиялари орқали Ўзбекистон спорт делегациясининг Аргентина Олимпиадаси учун йўлланмалари сони 29тага етди. Ушбу кўрсаткич мамлакатимиз учун ўсмирлар Олимпия ўйинларидаги рекорд ҳисобланади. Бунгача Ўзбекистон делегацияси ўсмирлар Олимпиадасида кўпи билан 28 нафар спортчи билан иштирок этган. Ҳали олдинда сузиш, дзюдо ва теннис бўйича лицензиялар қўлга киритилиши эҳтимоли мавжудлигини ҳисобга оладиган бўлсак, ушбу натижа янада яхшиланиши аниқ.