Xabar berib o‘tganimizdek, Bangkok shahrida yengil atletika bo‘yicha yoshlar o‘rtasida Osiyo chempionati nihoyasiga yetdi. Unda o‘zbekistonlik yosh atletlar ham ishtirok etishdi.

E’tiborlisi, ushbu nufuzli musobaqada uch nafar sportchimiz – Regina Adashboyeva (bosqon uloqtirish), Roksana Xudoyarova (uchxatlab sakrash) va Umid Hasanov (bosqon uloqtirish) belgilangan me’yorni bajarib, oktyabr oyida Buenos-Ayresda bo‘lib o‘tadigan III yozgi o‘smirlar Olimpiya o‘yinlarida ishtirok etish huquqini qo‘lga kiritishdi.

Bugun terma jamoamiz a’zolari musobaqadagi ishtiroklarini yakunlab, yurtimizga qaytib kelishdi. Ularni Islom Karimov nomidagi Toshkent xalqaro aeroportida Milliy olimpiya qo‘mitasi va yengil atletika federasiyasi mutasaddilari, murabbiylar, sportchilarning yaqinlari va ommaviy axborot vositalari xodimlari kutib olishdi.

«Musobaqa his-hayajonli damlarga boy bo‘ldi. Osiyo chempionati oldidan juda hayajonlangandim. Ammo, yakunda o‘z maqsadimga yetdim va vatanimiz uchun muhim bo‘lgan yo‘llanmani qo‘lga kirita oldim. Bu faqat boshlanishi. Endi bizni Argentinadagi Olimpiya o‘yinlari kutib turibdi. O‘yinlargacha qattiq tayyorgarlik ko‘ramiz va u yerda ham medallar qo‘lga kiritib, yurtdoshlarimizni xursand qilmoqchimiz», – dedi Olimpiya o‘yinlarining bo‘lajak ishtirokchisi Roksana Xudoyarova.

Qayd etish lozimki, yengil atletikachilarimizning lisenziyalari orqali O‘zbekiston sport delegasiyasining Argentina Olimpiadasi uchun yo‘llanmalari soni 29taga yetdi. Ushbu ko‘rsatkich mamlakatimiz uchun o‘smirlar Olimpiya o‘yinlaridagi rekord hisoblanadi. Bungacha O‘zbekiston delegasiyasi o‘smirlar Olimpiadasida ko‘pi bilan 28 nafar sportchi bilan ishtirok etgan. Hali oldinda suzish, dzyudo va tennis bo‘yicha lisenziyalar qo‘lga kiritilishi ehtimoli mavjudligini hisobga oladigan bo‘lsak, ushbu natija yanada yaxshilanishi aniq.