PEPSI Суперлига 16-турининг энг қизиқ ўйинларидан бири Қаршида кечди. Унда “Насаф” ва “Навбаҳор” ўзаро баҳс олиб борди. Қизиқарли кечган ўйинда дуранг натижа қайд этилди - 1:1.
Ўйиндан сўнг ўтказилган матбуот анжуманида наманганликлар бош мураббийи Илҳом Мўминжонов қуйидагича фикр билдирди:
“Бугун унчалик ҳам зўр ўйнамасдан 1 очко олдик. Ўйиндан кўнглим тўлмади. Бизда мудом барқарор ўйнайдиган жамоа деярли йўқ. Шу сабабдан ҳам жамоаларимиз баъзан зўр ўйнаб, кейин бироз барқарорликни йўқотиб қўйишади. “Навбаҳор” ҳам шу сабабли бугун ўз ўйинини кўрсата олмади. Балки танаффусдан кейин биринчи ўйин бўлганига ўйинимиз қовушмагандир. Таркибга янги қўшилган легионер ва маҳаллий футболчилар ҳали мавсумнинг ҳал қилувчи ўйинларида жамоамизга наф келтиришларига умид қиламан”, - деди Мўминжонов.
