PEPSI Superliga 16-turining eng qiziq o‘yinlaridan biri Qarshida kechdi. Unda “Nasaf” va “Navbahor” o‘zaro bahs olib bordi. Qiziqarli kechgan o‘yinda durang natija qayd etildi - 1:1.
O‘yindan so‘ng o‘tkazilgan matbuot anjumanida namanganliklar bosh murabbiyi Ilhom Mo‘minjonov quyidagicha fikr bildirdi:
“Bugun unchalik ham zo‘r o‘ynamasdan 1 ochko oldik. O‘yindan ko‘nglim to‘lmadi. Bizda mudom barqaror o‘ynaydigan jamoa deyarli yo‘q. Shu sababdan ham jamoalarimiz ba’zan zo‘r o‘ynab, keyin biroz barqarorlikni yo‘qotib qo‘yishadi. “Navbahor” ham shu sababli bugun o‘z o‘yinini ko‘rsata olmadi. Balki tanaffusdan keyin birinchi o‘yin bo‘lganiga o‘yinimiz qovushmagandir. Tarkibga yangi qo‘shilgan legioner va mahalliy futbolchilar hali mavsumning hal qiluvchi o‘yinlarida jamoamizga naf keltirishlariga umid qilaman”, - dedi Mo‘minjonov.
